Îsal, sala 2024-an, «Komîta Xelata Kemal Henan» nivîskarê Kurd mamoste Berzo Mehmûd layiqê vê xelatê bijart.
Ahenga Roja Rojnamegeriya Kurdî de, ku îro, 22.04.2024-an, li Navenda Partiya Yekîtî Ya Demokrat a Kurd Li Sûriyê «YEKÎTλ li Qamişlo, bi beşdariya birek rewşenbîr, nivîskar helbestvan û hezkirên zimanê Kurdî lidar ket, ji bal Komîteyê ve, xelat radestî Mamoste Berzo Mehmûd bû.
Hêjayî gotinê ye ku Berzo Mehmûd, di warê nivîsandina bi zimanê Kurdî de, xwedî dîrokeke berz û naskirî ye. Wî ji salên 1980-yî de, di desteyên Kovarên bi zimanê Kurdî yên wê demê de li Sûriyê derdiketin, mîna Gelawêj, Pirs û Hevind, kar û xebat kiriye, nivîs, berhem û lêkolînên wî, rûpelên wan xemilandine. Heşt pirtûkên wî bi zimanê Kurdî û çend berhem bi zimanê Erebî jî çap û belav bûne; ji bilî dehan gotar û lêkolînên zimanasiyê ku di kovarên Kurdî de bi zaravê Kurmancî û Soranî hatine belavkirin, û niha 2 pirtûkên wî bi zimanê Erebî û 3 pirtûk bi Kurdî jî bo çapê amade ne.
Em vê xelatê li mamoste Berzo Mehmûd pîroz dikin û hêvîdar in ku bi berhemên xwe her ew pirtûkxaneya Kurdî dewlemend bike.
Komîta “Xelata Kemal Henan”
Qamişlo 22.04.2024
* Rojnama Newroz – hejmar /159/ – 01 Gulana 2024 an – Ji weşanên Partiya Yekîtî ya Demokrat a Kurd li Sûriyê.