Ne tenê dewleta Turkiyê, lê belê rijêma Sûriyê û dewleta Îranê jî, ji hebûna Rêveberiya Xweser a ku sala 2013-an li Bakur û Rojhilatê Sûriyê hatiye damezrandin çavtengiyan dikin, bi armanca tunekirin û binaxkirina wê, ew bi hev re planan datînin.
Ji mêj ve ye ku gelê Kurd ê kevnar, lawê MED û MÎTAN, bi mêrxasî û girêdana xwe ya asê bi xak û welatê xwe ve hatiye naskirin, rehên xwe kûr di axa bav û kalan de berdane. Ji ber wê hindê jî, wî xwe li ber bayê tunekirin, pişaftin û windabûnê ragirtiye û mîna gelekî xweser, xwedî taybetmendiyên cuda, xwe parastiye.
Yek ji planên herî dijwar û metirsîdar ku îro li dij gelê me û Rêveberiyê, bi rêbaz û zanebûn ketiye rojevê, valakirina deverên Kurdî ji xelkên wê yên resen e!
Li Efrîna dagirkirî ku rêjeya Kurdan lê 97% bû, ji ber kiryarên hovane yên dewleta Turkiyê û çeteyên girêdayî wê ve, ew rêje daketiye 30%!! Û xelkên biyanî li şûna koçberan cîwar kirine. Herweha, li Serê Kaniyê û Girê Spî jî, projeya guhertina demografîk lidar e!
Li Herêma Cizîrê jî, bo heman armancê, dewleta Turkiyê dixwaze vê Rêvebriyê birûxîne, ji hundir ve seqet û pûç bike. Gefên dagirkirinê, digel bombebarankirin û terorkirina xelkên wê bi rêya balefirên bêajovan li pêş çavên dewletên mezin ên xwedî rol, rojane mirinê belav dike, hêminî û aramiya deverê têk dibe, tirsê di dilê welatiyan de diçîne, aboriya deverê dişkîne, agirê buhabûnê dil û eniya xelkên me dax dide û berê wan dide koçberiya malwêran!
Li hemberî vê plana rêvin û gemar ku welatê me ji xwediyên xwe vala dike, ustubarê Rêveberiya Xweser ew e ku bi zûtirîn dem, ew bi erkên xwe rabe, ji wan:
– Xweşkirina rewşa aborî ya xelkên me, û kêmkirina baceyê li ser metiryal, kelûpelên ku ji derve derbasî welêt dibin, û kontrolkirina buhayê firotina hemî pêdiviyên jiyanê ye, da ku bazirgan li gora dilên xwe welatiyan talan nekin.
– Peydakirina derfetên kar ji xelkê re, da karibin pêdiviyên jiyana xwe dabîn bikin.
– Pêşkêşkirina sûtemeniyê ji projeyên çandiniyê yên avî re.
– Vekirina projeyên geşepêdanê.
– Rê li pêş gendeliyê û diziya gel bê girtin, û gendel radestî dadgehan bibin da ku sezayê xwe yê dadmend bibîbin.
– Avakirina baweriyê di navbera welatiyan û Rêveberiyê de, ta bigihe radeya ku welatî xwe xwediyê wê bibîne û berevaniyê di ber de bike.
Bila em bawer bin, eger rewş wiha berdewam bibe, welatê me ji xelkên xwe vala dibe, rêjeya hebûna wan kêm dibe, û projeyên neyarên hebûna gelê me bicih dibin. Ji ber vê hindê, ji hemî xebatkar û xêrxwazan tê xwestin ku ji bo beravêtina vê projeya nemirovane dest bidin hev û xebateke bêwestan bikin!
* Rojnama Newroz – hejmar /154/ – 03 Mijdar 2022 an – Ji weşanên Partiya Yekîtî ya Demokrat a Kurd li Sûriyê.
