De bajo
Lo siwarê Şêmaran
Hebinê di bin rima te de
Benê sîdareya ziman dirêjan
Di çerxeke guhbel de bû
Gunîrkê li ser Stûyê Gamêşan
Doxîna dilê evîndaran
Di mizgefta şeydê de bû
Rista kevokên basko kirî
Hevsarê Çavên min û te bû
De bajo ..
Berî ku keriyê Gakofiyan
Li Kudikên Berazan dang bibe
De bajo …..
De bajo serwanê heviyan
Pûka zivistanê
Hîn di pişta me de
Teziyên sibehê dikşîne
Destmala Bêrîbanê
Hîn di koziyên ber malê dê
Rondikên dilketinê dadmalîne
Tu ne Şehbazê asîmananî
Da Çivîka sîngê min
Bi dilsozî biperpitînî
Û nejî
Ez gavanê xewnên xwe me
Da bi destên yarê ve
Dil girêdim û bihêlim
De bajo rêwiyê rê wendayî
De bajo pîverê Ewran
Li ser daniştoka dilê min
Nema îdî rawestî
Şivanxapîkan
Keriyê sawirên asoyê
Ber bi bahozeke hemiqî ve bir
Te jî
Bi qîlên omîdan
Pizwenda şeverçderiyê
Bi niçniç û niznizan
Di navbera min û Dîlberê de
Hilqetand û hilweşand
De bajo
Talankerê henaseyên berbangê
11-1-2017