Ji Tahir Elçî re
Minara Çarling
bang bide û bêje
Tahirê min
Paqijê min
kelemê di çavên çavsoran de
parêzvanê rastîbêj
tu çima bêpêjinî
lingên min birîndar in
bi birîna serê xwe
birîna min birîndartir neke
rabe û rastî bêje
ferişteyên tenêtiyê
li benda te ne
dêwê mirinê bileze
rabe
rabe maça dawî danyne
ser birîna min
ez axîna vê sarmaçê dizanim
ev çend sed sal in
kevok aşitîyê diqîrin li vir
û li vir têne kuştin
ez leyîstikvanên vê leyîstikê
û dengê vê çekê
nas dikim
destên mijî mirinê
li vir hembêz dikin
dîsa mij e
dîsa kemîna segur e
dîsa çûk
di birîna min de dimirin
tu çima welê zû diçî
ma mirin welê dirêj e
ma mirin welê bi êşe
xwe ragire
rabe
jana bêdewletiya welatê xwe
bêje
balyozê mirinên
ji malzaroka bêdewletî
mirî dizin
rabe bêje
28.11.2015