Nivîskar û helbestvanê Kurd Lorî Tildarî di sala 1957ê de, li gundê Tildarê jidayîk bûye. Gundê Tildarê bi bajarê Dêrikê ve girêdayî ye, û dikevê navbera Dêrikê û Endîwerê. Wî xwendina xwe ya seretayî li gundê xwe, û ya navendî û lîseyê li dibistana Yûsiv ‘Ezme li bajarê Dêrikê bidawî kiriye. Piştî bawernameya bakaloriya ji wir wergirtiye, wî 3 salan li zankoya Şamê beşê mafnasiyê xwendiye.
Gorbihişt Lorî Tildarî di sala 1975ê de dest bi nivîsandina helbestê kiriye; lê di sala 1979ê de, wî dest bi ristin û hûnandina helbesta Kurdî ya kevineşop (klasîk), hem jî ya nûjen kiriye. Ji bilî helbestê jî, wî gelek lêkolîn derbarê stranên Kurdî û şirovekirina wan bi şêweyekî wêjeyî kirine. Hêjayî gotinê ye ku derdora 800 stranî di 3 pirtûkan de kom kirine.
Tildarî 4 dîwanên helbestê, 3 bi şêweyê klasîk û yek e nûjen, nivîsîne, û ew jî ev in:
1- Halan, bi şêweyê klasîk e û çapkirî ye.
2- Seqlan, bi şêweyê klasîk e.
3- Tildar, bi şêweyê klasîk e.
4- Sefan, helbestên nûjen in.
Her sê dîwanên (Seqlan, Tildar û sefan) ji çapê re amade ne.
* Rojnama Newroz – hejmar /158/ – 01 Mijdar 2023 an – Ji weşanên Partiya Yekîtî ya Demokrat a Kurd li Sûriyê.